Xəbərlər

"Novruz- 2026" düşərgəsi çərçivəsində tanınmış şair, yazıçı və kinodramaturq, İlqar Fəhmi ilə görüş keçirilib

Azərbaycan Həmkarlar İttifaqları Konfederasiyasının (AHİK) üzv təşkilatı olan Elm və Təhsil İşçiləri Həmkarlar İttifaqı (ETİHİ) Respublika Komitəsinin “Təhsil İstirahət Mərkəzi”ndə ali, orta ixtisas və peşə təhsili müəssisələrinin əməkdaşları üçün təşkil etdiyi “Novruz 2026” düşərgəsi çərçivəsində tanınmış yazıçı və kinodramaturq, əməkdar mədəniyyət işçisi İlqar Fəhmi ilə görüş keçirilib.

Görüş 2026-cı ilin Fəaliyyət Planında nəzərdə tutulmuş “Azərbaycan dilinin qorunması” üzrə tədbirlər çərçivəsində həyata keçirilib.

“Ədəbi dilimiz estetik-psixoloji müstəvidə” mövzusuna həsr olunan görüşdə yazıçı Azərbaycan dilinin saflığının qorunmasında ədəbiyyatın rolundan bəhs edib. O bildirib ki, ölkə başçısının Azərbaycan dilinin qorunması istiqamətində ictimaiyyətə ünvanladığı tövsiyələr mühüm əhəmiyyət kəsb edir və bu prosesdə təhsil işçilərinin müstəsna xidmətləri var. 

Qeyd olunub ki, qloballaşan dünyada dilin xarici təsirlərdən qorunması çətinləşsə də, ədəbiyyat və dilçilik sahəsində nəşrlər bu istiqamətdə mühüm rol oynayır.

Tədbirdə ETİHİ Respublika Komitəsi sədrinin birincu müavini Tehranağa Abdullayev çıxış edərək Azərbaycan dilinin saflığının qorunmasının komitənin fəaliyyət planının əsas istiqamətlərindən biri olduğunu vurğulayıb. Bildirilib ki, bu sahədə mütəmadi tədbirlər həyata keçirilir və məsələ təşkilatın prioritetləri sırasında xüsusi yer tutur.

Tədbir iştirakçıları Azərbaycan dilinin inkişafı və qorunması ilə əlagədar onları maraqlandıran sualları və təklifləri səsləndiriblər. Maraqlı müzakirələrlə keçən tədbir iştirakçılar tərəfindən rəğbətlə qarşılanıb, bu cür müzakirələrin davamlı olması təklif olunub.

ETİHİ-nin “Novruz 2026” düşərgəsinin ikinci mərhələsinə start verilib

Ramazan və Novruz bayramları münasibətilə tətil günlərində təşkil edilən düşərgəyə 800-dən çox ittifaq üzvü cəlb olunub

Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsi tərəfindən “Təhsil İstirahət Mərkəzində” təşkil olunan ali, orta ixtisas və peşə təhsili müəssisələrinin əməkdaşları üçün “Novruz 2026” adlı düşərgəsinin ikinci mərhələsinə start verilib.

İki mərhələdə keçirilən düşərgəyə ümumilikdə 800- dən çox təhsil işçisi cəlb olunub.

Düşərgənin ikinci hissəsinin rəsmi açılış mərasimində Elm və Təhsil İşçiləri Həmkarlar İttifaqı Respublika Komitəsi sədrinin birinci müavini Tehranağa Abdullayev çıxış edərək Azərbaycan Həmkarlar İttifaqları Konfedrasiyasının sədri Sahib Məmmədov və ETİHİ Respublika Komitəsinin sədri Araz Paşayevin bayramlar münasibətilə təhsil işçilərinə təbriklərini çatdırıb, düşərgədə iştirak edən ittifaq üzvlərinə xoş istirahət və gələcək fəaliyyətlərində uğurlar arzu edib.

Əməkdar mədəniyyət işçisi şair, yazıçı, kinodramaturq İlqar Fəhmi təhsil ictimaiyyəti ilə tədbirdən böyük məmnunluq hissi keçirdiyini söyləyərək bu düşərgənin təşkil olunmasına görə Elm və Təhsil İşçiləri Həmkarlar İttifaqının rəhbərliyinə, əməyi keçən hər kəsə öz minnətdarlığını bildirib.

Tədbir rəsmi hissədən sonra tonqal ətrafında əyləncəli proqramla davam etdirilib.

Qeyd edək ki, tətil günlərində davam edən düşərgə proqramı çərçivəsində təhsil işçiləri üçün zəngin və çoxşaxəli maraqlı fəaliyyət planı hazırlanıb. Proqram həm milli-mədəni dəyərlərin təbliğini, həm də təhsil işçilərinin peşəkar inkişafını təşviq etməyə yönəlib.

Bayram tədbirləri çərçivəsində Novruzun qədim ənənələrini əks etdirən müxtəlif mədəni və əyləncəli tədbirlər təşkil edilib.

Bununla yanaşı, düşərgə müddətində Azərbaycanın tanınmış elm xadimləri və mütəxəssislərinin iştirakı ilə müxtəlif mövzularda təlim və seminarlar da təşkil olunub.

Novruz 2026” düşərgəsində təhsil işçiləri üçün süni intellekt mövzusunda təlim keçirilib

21–25 mart tarixlərində təşkil olunan “Novruz 2026” düşərgəsi çərçivəsində Elm və Təhsil İşçiləri Həmkarlar İttifaqı Respublika Komitəsinin üzvləri üçün “Təhsildə süni intellekt: yeni perspektivlər” mövzusunda maarifləndirici təlim keçirilib.

Təlim Mədəniyyət və İncəsənət Universitetinin Televiziya və Kino Studiyasının müdiri, süni intellekt üzrə mütəxəssis Azər Həsənov tərəfindən təqdim olunub. Tədbirin əsas məqsədi təhsil işçilərini süni intellekt texnologiyalarının imkanları ilə tanış etmək, onların tədris prosesində praktik tətbiq yollarını göstərmək və müasir rəqəmsal alətlərdən səmərəli istifadə bacarıqlarını inkişaf etdirmək olub.

Məlumat üçün bildirək ki, düşərgə iştirakçılarının çoxsaylı istəyi nəzərə alınaraq “Təhsildə süni intellekt: yeni perspektivlər” mövzusunda maarifləndirici təlim düşərgənin son günündə açıq hava şəraitində növbəti dəfə təşkil olundu.

Təlim zamanı iştirakçılara süni intellektin ümumi prinsipləri, müəllim və tələbələr üçün istifadəsi, dərs prosesinə inteqrasiyası, eləcə də məzmun yaradılması, vizual və video generasiya imkanları barədə praktiki nümunələr təqdim edilib. Bununla yanaşı, süni intellektdən istifadə zamanı etik qaydalar, akademik dürüstlük və plagiat məsələlərinə də xüsusi diqqət yetirilib.

Sessiya interaktiv müzakirələr və sual-cavab formatında davam edib. Təhsil işçilərinin fəal iştirakı ilə keçən görüş iştirakçılar tərəfindən böyük maraqla qarşılanıb və mövzu ətrafında geniş fikir mübadiləsi aparılıb.

Qeyd edək ki, bu cür təlimlər təhsil işçilərinin rəqəmsal bacarıqlarının artırılması və müasir texnologiyaların tədris mühitinə inteqrasiyası baxımından mühüm əhəmiyyət daşıyır.

“Novruz 2026” düşərgəsində “Muğam aləminə səyahət” adlı görüş təşkil olunub

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsinin təşkilatçılığı ilə keçirilən “Novruz 2026” düşərgəsi çərçivəsində “Muğam aləminə səyahət” adlı görüş baş tutub.

Tədbirdə çıxış edən ETİHİ Respublika Komitəsinin sədr müavini Mirzə Cəfərzadə milli-mənəvi dəyərlərimizin qorunması və təhsil işçilərinə, o cümlədən gənc nəslə aşılanması baxımından belə görüşlərin əhəmiyyətini vurğulayıb. Bildirib ki, muğam sənəti xalqımızın zəngin mədəni irsinin ayrılmaz hissəsidir və bu irsin təbliği istiqamətində həyata keçirilən tədbirlər xüsusi önəm daşıyır.

Görüşdə Xalq artisti Teyyub Aslanov muğamın tarixi kökləri, ifaçılıq ənənələri və Azərbaycan musiqi mədəniyyətində tutduğu yer barədə ətraflı məlumat verib, iştirakçıların suallarını cavablandırıb.

Daha sonra Teyyub Aslanov tarda Vüsal Qasımovun, kamançada Anar Yusubun müşayiəti ilə muğam nümunələri və xalq mahnıları səsləndirib.

İfa olunan musiqi nömrələri düşərgə iştirakçıları tərəfindən maraq və alqışlarla qarşılanıb.

ETİHİ ittifaq üzvləri üçün tətil günlərində bayram düşərgəsi təşkil edib

Ramazan və Novruz bayramları münasibətilə tətil günlərində təşkil edilən düşərgəyə 800-ə yaxın ittifaq üzvü cəlb olunub.

Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsi tərəfindən “Təhsil İstirahət Mərkəzində ” ali, orta ixtisas və peşə təhsili müəssisələrinin əməkdaşları üçün “Novruz 2026” adlı düşərgə təşkil olunub.

İki mərhələdə tışkil edilən düşərgədə ümumilikdə 800-ə yaxın təhsil işçisi iştirak edəcək.

Düşərgənin 1-ci hissəsinin açılış mərasimində Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə çıxış edərək komitə sədri Araz Paşayevin Müqəddəs Ramazan və Novruz bayramları münasibətilə təhsil işçilərinə təbriklərini çatdırıb, düşərgədə iştirak edən respublikanın müxtəlif bölgələrindən olan ali, orta ixtisas və peşə təhsili müəssisələrində çalışan ittifaq üzvlərinə xoş istirahət və gələcək fəaliyyətlərində uğurlar arzu edib.

Tətil günlərində davam edən düşərgə proqramı çərçivəsində təhsil işçiləri üçün zəngin və çoxşaxəli maraqlı fəaliyyət planı hazırlanıb. Proqram həm milli-mədəni dəyərlərin təbliğini, həm də təhsil işçilərinin peşəkar inkişafını təşviq etməyə yönəlib.

Bayram tədbirləri çərçivəsində Novruzun qədim ənənələrini əks etdirən müxtəlif mədəni və əyləncəli tədbirlər təşkil edilib.

Bununla yanaşı, düşərgə müddətində Azərbaycanın tanınmış elm xadimləri və mütəxəssislərinin iştirakı ilə müxtəlif mövzularda təlim və seminarlar da təşkil olunacaq.

Novruz Bayramı münasibətilə tədbir təşkil olundu.

Elm və Təhsil İşçiləri Həmkarlar İttifaqı Bərdə Rayon Komitəsinin təşəbbüsü və təşkilatçılığı ilə Novruz bayramına həsr olunmuş tədbir keçirilib.

Tədbir restoranda təşkil olunub və rayonun müxtəlif təhsil müəssisələrində fəaliyyət göstərən ilk təşkilat sədrləri iştirak ediblər. Tədbirin açılışında Azərbaycan Respublikasının Dövlət Himni səsləndirilib, Vətən uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib.

Bərdə Rayon Komitəsinin sədri Misir Ənvərli çıxış edərək Novruz bayramının xalqımızın milli-mənəvi dəyərlərini, birlik və həmrəyliyini özündə əks etdirən qədim bayramlardan biri olduğunu vurğulayıb. Bildirilib ki, bu cür tədbirlər həmkarlar arasında həmrəyliyin möhkəmləndirilməsinə və əməkdaşlıq münasibətlərinin inkişafına töhfə verir.

Tədbir çərçivəsində ilk təşkilat sədrləri bir araya gələrək baharın gəlişini və milli dəyərlərimizi əks etdirən səmimi mühitdə görüşüblər. İştirakçılar bayram münasibətilə bir-birinə xoş arzularını çatdırıb, həmkarlar arasında qarşılıqlı hörmət və əməkdaşlığın əhəmiyyəti bir daha qeyd olunub.

Səmimi və bayram ab-havasında keçən tədbirdə sədrlər göstərilən diqqət və qayğıya görə Azərbaycan Həmkarlar İttifaqları Konfederasiyasının və Elm və Təhsil İşçiləri Həmkarlar İttifaqı Respublika Komitəsinin rəhbərliyinə öz təşəkkürlərini bildirlər. Tədbir xoş təəssüratlarla başa çatıb və sonda xatirə şəkili çəkilib.

ETİHİ Respublika Komitəsinin üzv təşkilatlarında təhsil işçilərinə iftar süfrələri təşkil edilib.

Elm və Təhsil İşçiləri Həmkarlar İttifaqının şəhər və rayon üzv təşkilatları tərəfindən müqəddəs Ramazan ayı münasibətilə iftar süfrələri təşkil olunub.

Bu tədbirlərdə şəhid və qazi ailələri, ittifaq üzvləri, həssas sosial qrupdan olan şəxslər iştirak edib, birlik və həmrəylik ruhu, milli-mənəvi dəyərlərə bağlılıq xüsusi vurğulanıb.

İftar süfrələrində Azərbaycanın bütövlüyü uğurunda canlarından keçmiş şəhidlərin əziz xatirəsi bir dəqiqəlik sükutla yad edilib, xalqımızın əmin amanlığı, sabitliyi üçün dualar oxunub, mərasim tədbir iştirakçılarının xoş təssüratları ilə davam etdirilib.

İttifaq üzvlərimizə bayram hədiyyələri təqdim edildi.

Novruz bayramı münasibətilə Azərbaycan Həmkarlar İttifaqları Konfederasiyası və Elm və Təhsil İşçiləri Həmkarlar İttifaqı Respublika Komitəsi tərəfindən Bərdə Rayon Komitəsi üzrə fəaliyyət göstərən təhsil müəssisələrində çalışan ittifaq üzvlərinə bayram hədiyyələri paylanılıb, onların Novruz bayramı təbrik olunub.

Bayram münasibəti ilə məktəbəqədər təhsil müəssisələrində çalışan müəllimlər, texniki işçilər və digər təhsil işçiləri diqqət və qayğı ilə əhatə olunublar.

Onlara göstərilən diqqətə görə təşəkkürlərini bildirərək, bu cür tədbirlərin davamlı olmasının vacibliyini qeyd ediblər.

Elm və Təhsil İşçiləri Həmkarlar İttifaqı Bərdə Rayon Komitəsi bundan sonra da üzvlərinin rifahının yüksəldilməsi və sosial müdafiəsinin gücləndirilməsi istiqamətində fəaliyyətini davam etdirəcək.

Bərdədə müəllimin 65 illik yubileyi qeyd olunub.

Bərdə rayonu Nazim Hüseynov adına Alpout kənd tam orta ümumtəhsil məktəbinin müəllimi Rəhimova Təranə Qədir qızının 65 illik yubileyi münasibətilə tədbir keçirilib.

Tədbirdə Elm və Təhsil İşçiləri Həmkarlar İttifaqı Bərdə Rayon Komitəsinin nümayəndələri və məktəb kollektivi iştirak ediblər. Çıxış edənlər Təranə Rəhimovanın uzunillik pedaqoji fəaliyyətindən, gənc nəslin təlim-tərbiyəsində göstərdiyi xidmətlərdən bəhs edərək ona gələcək fəaliyyətində uğurlar arzulayıblar.

Yubiley münasibətilə Rəhimova Təranə Qədir qızı Elm və Təhsil İşçiləri Həmkarlar İttifaqı Bərdə Rayon Komitəsi tərəfindən fəxri fərmanla təltif olunub, həmçinin ona hədiyyə təqdim edilib.

Sonda yubilyar göstərilən diqqət və qayğıya görə təşəkkürünü bildirib.

Şəhərsalma və Memarlıq ili çərçivəsində İçəri şəhərə ekskursiya təşkil edildi.

15 Mart 2026- cı il tarixdə Elm və Təhsil İşçiləri Həmkarlar İttifaqı Bərdə Rayon Komitəsi və Elm və Təhsil İşçiləri Həmkarlar İttifaqı Respublika Komitəsinin dəstəyi ilə bir qrup təhsil işçilərinin " Şəhərsalma və Memarlıq ili" çərçivəsində İçəri şəhərə ekskursiyası təşkil edildi.Ekskursiyada " İçəri şəhər Dövlət Tarix- Memarlıq Qoruğu " idarəsinin əməkdaşlarının köməkliyi ilə rayonun təhsil işçiləri İçəri şəhərin tarixi Memarlıq abidələrini - " Şirvanşahlar sarayı" ,"Qızıl qalası", , " Bəylər məscidi", " Məhəmməd məscidi", " Cümə məscidi" və əlavə bir neçə milli memarlıq arxitekturası əsasında inşa olunmuş tarıxı abidələri ziyarət etdilər. Azərbaycan tarixinin qədimliyini, zənginliyini əyani faktlarla müəyyən edən müəllimlərin biliklərinin və dünyagörüşlərinin artması üçün ekskursiyanın böyük əhəmiyyəti oldu.

Təhsil işçiləri onlara göstərilən xidmətdən , turun təşkilindən hədsiz razılığını bildirdilər və layihənin reallaşmasına dəstək göstərdiyinə görə Elm və Təhsil İşçiləri Həmkarlar İttifaqı Respublika Komitəsinə öz minnətdarlıqlarını bildirdilər və

sonda xatirə şəkili çəkildi.

Bərdədə Ramazan ayı münasibətilə iftar süfrəsi təşkil olundu.

Müqəddəs Ramazan ayı münasibətilə Elm və Təhsil İşçiləri Həmkarlar İttifaqı Bərdə Rayon Komitəsi tərəfindən şəhid ailələri, müharibə iştirakçıları və təhsil işçilərinin iştirakı ilə iftar süfrəsi təşkil olunub.

Tədbirdə Elm və Təhsil İşçiləri Həmkarlar İttifaqı Bərdə Rayon Komitəsinin sədri Misir Ənvərli, Qarabağ Regional Təhsil İdarəsinin İnzibati təşkilat sektorunun müdiri Qurban Məmmədov, Bərdə Rayon Təhsil Sektorunun müdiri Nicat İsmayılov, şəhid ailələri, qazilər və təhsil işçiləri iştirak etdilər.

Tədbir Azərbaycan Respublikasının Dövlət Himninin səsləndirilməsi ilə başladı. Şəhidlərimizin əziz xatirəsi dərin ehtiramla yad edildi, onların Vətən uğrunda göstərdikləri qəhrəmanlıq bir daha vurğulandı.Çıxış edən komitə sədri Misir Ənvərli Ramazan ayı səbir,mərhəmət və birlik ayı deyə vurğulayıb .Daha sonra şəhid ailələrinə göstərilən diqqət və qayğının dövlət siyasətinin əsas istiqamətlərindən biri olduğunu vurğulayıb, onların hər zaman cəmiyyətin diqqət mərkəzində olduqlarını bildirib.

Sonda şəhid ailələri ilə səmimi söhbətlər aparılıb, onlara mənəvi dəstək göstərilib. Belə tədbirlərin keçirilməsinin şəhid ailələrinə ehtiramın və həmrəyliyin ifadəsi olduğu qeyd edilib.

Allah bütün şəhidlərimizə rəhmət eləsin, qazilərimizə can sağlığı versin.

Tədbirin sonunda xatirə şəkili çəkilib.

65 illik yubiley qeyd olundu.

Bərdə şəhəri Alı Mustafayev adına 5 nömrəli tam orta ümumtəhsil məktəbinin müəllimi Baxşalıyeva Balaxanım İsa qızının 65 illik yubileyi qeyd olunub.

Yubiley münasibətilə Elm və Təhsil İşçiləri Həmkarlar İttifaqı Bərdə Rayon Komitəsinin sədri Misir Ənvərli tərəfindən uzunillik səmərəli pedaqoji fəaliyyətinə və təhsil sahəsində göstərdiyi xidmətlərə görə yubilyara fəxri fərman və hədiyyə təqdim olunub.

Balaxanım müəlliməyə möhkəm cansağlığı, uzun ömür və gələcək həyatında yeni uğurlar arzulayırıq.